大家好，我係Olivia，如果有留意開的士牌嘅朋友都應該知道，的士牌價喺上年2023年嘅表現確實唔係咁理想，以市區的士牌價為例，上年全年下跌咗大約兩成，咁到底今年2024年頭一季嘅表現又係點呢？我哋今集就會同大家睇一睇有關嘅數據，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。
我哋可以先睇一睇今年2024年第一季嘅的士牌價走勢圖表，我哋睇到情況都一樣唔係咁理想，我哋就以市區的士牌價為例，由年頭357萬下跌至3月尾329萬，下跌咗28萬，跌幅大約7.8%，至於新界的士牌價都同樣下跌，由年頭293萬下跌至3月尾266萬，下跌咗27萬，跌幅大約9.2%。
咁至於的士過戶數量喺2024年第一季嘅表現，又會唔會好似的士牌價咁出現下跌，情況又理唔理想呢？我哋先睇一睇今年2024年頭一季運輸署嘅的士過戶數量，根據運輸署俾我哋嘅官方數字睇得到，以市區的士為例，喺2024年頭一季每月嘅過戶數量，維持喺164至171宗，實際呢個數字比較起上年2023年同期嘅數字都有所上升，如果我哋嘗試睇返由上年2023年年頭至今嘅的士過戶數量就會見得到，今年2024年頭一季嘅的士過戶數量表現其實都算唔錯，交投相對活躍，但可惜牌價仍然都要下跌。
其實最值得關注就係本身的士生意嘅情況係點，呢方面我哋可以睇吓運輸署最新嘅官方數據，平均每日公共交通乘客人次趨勢，最新只係顯示截至1月份嘅數據，喺呢個圖表我哋可以見得到，乘客人次趨勢喺近期都有所回升，1月份嘅平均每日乘客人次已經回升到接近1200萬嘅水平，相信的士嘅生意大致上已經回復到疫情前8成以上，但由於港人北上消費熱潮持續，市面店舖執笠情況亦受到極度關注，令大家都擔心本港經濟情況，至於的士營運方面，的士保費仍然持續有所增加，再加上美國減息預期有所落差，影響整體投資氣氛，相信以上幾點都係的士牌價最近下跌嘅主要因素。
咁到底的士牌有冇啲利好消息存在？大家今年不妨可以留意以下呢啲消息，首先，的士有望今年獲准加價，長遠有助增加的士司機收入，另外，市場上陸續推出新款智能咪錶及流動支付系統，有助提升的士生意及乘搭體驗，再加上政府引入的士車隊制度以及的士司機違例記分制，相信長遠有助改善整體的士嘅服務質素，至於今年最值得關注嘅消息就係，運輸署承諾今年上半年內修例規管網約白牌車平台，但係實際嘅修例嘅情況係點仍然係未知之數，大家一定要密切留意事態嘅發展，一有最新消息我哋會第一時間同大家報導。
唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App H.K.T.E.x. 一站式的士買賣租賃平台，密切留意我哋香港的士交易所，我哋下集見。
Olivia
香港的士交易所 HKTEx 主播
2024年4月26日
P.S.：短片版本請於YouTube上收看：https://youtu.be/Ur7ytqlfpts
Comments