大家好，我係Olivia，今日同大家睇睇一單有關的士嘅新聞。
政府早前建議修例改善的士服務，包括引入車隊制度，增設司機違例記分制等等，香港的士業議會主席黃卓邦，今日8月2號早上喺電台節目中表示，對於司機違例記分制中部分項目有質疑，指當局未有太清晰嘅解釋，質疑「係咪投訴數字就係集中喺呢11個項目呢？」佢認為，當局應該對症下藥，集中資源先處理「罪證確鑿」嘅問題，例如濫收車資、惡意改咪錶呢類情況。
黃卓邦又提到，11項當中有一項係要求車內咪錶要設置喺紀錄位置之上，但點樣為之做到、點樣為之干犯呢項規定，當局未有詳細說明，佢又質疑「兜路」嘅問題，點樣先為之「兜路」，有業界人士會因為咁而擔心自己誤墮法網，甚至會因為咁而被記分，最後更加有機會失去的士駕駛執照，對於記分制，佢認為重點並非裡面有幾多項項目，而係相關嘅規定要寫得好清晰。
至於車隊制度，黃卓邦指出，因為車隊制度能夠提供多一種嘅營運模式，的士業界普遍都會支持，但係要成為車隊，需要一定嘅投資，例如買新車、設立投訴機制等等，喺現時建議嘅車隊制度之下，車隊嘅的士收費係同一般獨立嘅的士一樣，對業界嚟講係缺乏經濟誘因，以致大家對車隊制度嘅反應冷淡。
黃卓邦認為，如果可以俾車隊的士嘅起錶價錢提高，有助業界更主動改善服務質素，同時可以幫助的士司機增加收入，吸引新人加入，而市民喺乘坐的士嘅時候可以多一個選擇，實際有三贏嘅局面，佢期望當局可以考慮俾車隊提高的士收費，令業界服務水平有上升嘅契機。
立法會交通事務委員會委員張欣宇指出，相關嘅法例最大目標在於提升整體的士嘅服務質素，而並非改善經營環境，佢嘅核心應該放喺消費者乘客嘅角度，但係而家呢啲聲音比較少，認為要多聚焦點樣改善乘客嘅感受，車隊制度雖然可以帶嚟改善，但係擔心並非所有的士都會參與，有部分乘客或者未能受惠。
至於有關記分制，張欣宇表明當中嘅項目都係法例唔容許嘅行為，全部都需要經法庭定罪，並非有「新制度」，但佢預料就算提升咗罰則，都唔足以提升的士服務，就以佢遭拒載嘅經驗，即使佢作為議員，都唔知道可以點樣作出投訴同提出證據。
張欣宇都提到，今年3月有一位遊客，乘坐的士由機場到北角，要求收費HK$600，事發至今，即使佢一直幫嗰位遊客寫信跟進，都未有任何結果，相信都會不了了之，佢坦言，針對投訴好難成立嘅問題，如果唔討論、唔解決，預料記分制嘅成效有限。
咁今集就同大家講到呢一度，歡迎留言分享你嘅睇法，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見！
Olivia
香港的士交易所 HKTEx 主播
2023年8月2日
P.S.：短片版本請於YouTube上收看：https://youtu.be/5gcVZx5Iba4
Comments