大家好，歡迎收睇「的士新聞資訊」，我係Mia，的士經營問題一直以嚟都備受社會關注，例如唔少嘅的士車主都埋怨的士保險費用昂貴，香港的士小巴商總會早前公開要求政府介入同保險業界商討，調整「天價」嘅的士保險費用，同埋嚴懲「白牌車」，否則就會發動「停擺」行動。
從事保險業嘅議員陳沛良喺接受傳媒訪問表示，認為而家嘅的士保險費用並唔係坊間講到咁高，的士行業如果可以一齊採取管控風險嘅措施，喺風險可以控制嘅情況下，調整保費係有得諗嘅。
其實經營的士保險呢盤生意亦唔易做，早排就有保險公司因盈利問題而拒絕承保的士保險，搞到滿城風雨，雖然事件已經告一段落，而家的士業界都買到保險，不過保費就比起以前較高，有人甚至形容係「天價」保費，陳沛良承認，的士保費比起以前可能係貴咗啲，但坊間傳聞保費要8萬至9萬元一年嗰啲，只係好個別嘅例子，並非所有的士都係咁，佢解釋部分的士出意外嘅次數比較頻密，向保險公司索償得多，所以保費先至會比較貴。
睇返運輸及物流局早前嘅公布，涉及的士嘅交通意外數字，於整體交通事故宗數所佔嘅比例，一啲都唔低，由2019年至2021年嘅記錄，分別有4198宗、3408宗同埋4081宗有關的士嘅交通意外，最多嗰年的士意外佔整體交通事故宗數比例更加高達接近3成，而根據保險業監管局提供嘅數字，的士保險業務喺過去18年，即係2005年至2022年，當中有12年係錄得承保虧損。
陳沛良被傳媒問到，政府應唔應該補貼保險費用嚟減低的士業界嘅負擔，陳沛良就覺得做法並唔可取，事關政府唔應該單一傾向某個行業，萬一其他行業都有類似嘅要求，政府作出嘅補貼就沒完沒了，所以保費問題應該由行業自行解決。
咁到底的士行業要點樣應付保費嘅問題，陳沛良相信的士業界如果可以說服保險公司，意外風險係可以控制嘅話，相關保費應該有一定嘅調整空間，畢竟香港嘅保險市場，公司多、競爭大，只要計得掂條數，保險公司都唔會抬高保費，而減低意外風險嘅其中一個方法，陳沛良就建議的士安裝視像鏡頭，俾保險公司知道的士司機嘅駕駛狀況，同埋提升司機嘅警覺性，當做法運行一段時間而意外率降低咗，保險公司知道風險係可以控制，保費就自然有調整嘅空間。
唔知你對的士保費又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見！
Mia
香港的士交易所 HKTEx 主播
2023年8月16日
P.S.：短片版本請於YouTube上收看：https://youtu.be/T3SA758EpAU
#的士保險 #的士保費 #陳沛良 #香港的士小巴商總會 #保險業 #的士車主 #白牌車 #天價保險 #運輸及物流局 #的士意外 #交通意外 #保險業監管局 #HKTEx #香港的士交易所 #HKTExApp #一站式的士買賣租賃平台 #的士新聞資訊 #新聞 #港聞 #女主播
Comments