大家好，歡迎收睇「的士新聞資訊」，我係Karina，電子支付喺市場上日漸普及，香港嘅的士業界亦都開始進行數碼化轉型，本地的士管理營運商Mobile Shop旗下品牌CabCab，聯同生產力促進局轄下嘅汽車科技研發中心，研發出首個獲政府認可嘅智能的士咪錶，可以提供Call的士服務、電子支付系統、電子收據以及的士車隊管理等等嘅多種功能。
研發團隊喺今日1月31號嘅發佈會宣布，將會喺今年稍後3月份推出首階段計劃，喺100架市區同新界嘅的士安裝新嘅智能的士咪錶，預計喺第二季會推出電子支付系統服務，可以支援多種電子支付工具，當中包括：八達通、支付寶、微信支付、轉數快、PayMe同多種信用卡等等，涵蓋咗本港最常用嘅電子支付模式，亦都可以連接海外電子錢包。另外，日後如果喺司機接載乘客使用收費隧道、收費道路、收費區或者其他服務收費嘅時候，只需要喺智能咪錶上選取相應嘅附加費用選項，系統會識得即時自動計算車費，避免咗以往需要經司機人手計算附加費而出現嘅人為錯誤情況。研發團隊亦宣布計劃喺今年第三季，將智能咪錶嘅應用擴展至1000架的士，並且會推出Call的士嘅流動應用程式。
新智能咪錶嘅觸控式屏幕有5吋大，設有多種語言嘅語音功能，可以以廣東話、英文或者普通話讀出車費，研發團隊指出，新咪錶喺香港本地研發，比較能夠符合本地市場同迎合乘客嘅需要，令系統後續嘅維修同服務嘅發展都更加有持續性。
呢個研發項目嘅電子支付方案供應商「俊盟國際」主席及行政總裁勞俊傑表示，已經投入咗過千萬嘅資金去研發新智能的士咪錶，其中政府創新科技署嘅「創新及科技基金」亦撥出咗過百萬嘅資助金額，期望新智能咪錶嘅市佔率可以達到最少3份之1，佢又指出，預計系統初期並唔會向司機同乘客收取任何服務費，但始終系統開發同營運涉及一定嘅成本，日後唔排除需要向乘客收取相關嘅服務費用。
汽車科技研發中心行政總裁張梓昌表示，現時本港有超過18000架的士，期望新研發嘅智能咪錶喺日後可以協助推動智慧出行嘅發展，佢又解釋，新咪錶喺進入第二階段嗰陣時，可以收集的士數據，分析邊啲地區比較多乘客需要的士服務，等司機唔需要四圍兜圈搵客，幫助司機搵更多嘅生意。
香港無線電的士聯誼會主席黃羽庭就表示，新智能咪錶可以發展更多嘅電子化功能，可以節省人手嘅操作，能夠提升的士司機嘅服務效率同質素，協助改善的士業界嘅生態。
唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Karina
香港的士交易所 HKTEx 主播
2024年1月31日
P.S.：短片版本請於YouTube上收看：https://youtu.be/i37BMW41sOI
ความคิดเห็น