大家好，我係Olivia，喺而家呢個社會，財務自由已經成為好多人追求嘅目標，由於生活成本不斷上升，再加上未來唔確定性增加，大家都越嚟越重視點樣管理好自己嘅財富，喺呢個過程之中，有個常見嘅觀念就係「儲錢」係致富嘅關鍵，但係單靠儲錢真係可以致富？我哋今集就同大家探討一吓，未訂閱我哋頻道嘅朋友，記得訂閱，多謝支持。
首先，儲錢確實係有佢嘅優勢，儲錢可以幫你建立應急基金，應對突發開支，例如醫療費用、意外損失或者失業，當遇到突發嘅情況，如果你有足夠嘅儲蓄就可以減輕壓力，唔使因為冇錢而做出唔理智嘅決定。
另外，儲錢都係一種好嘅財務習慣，可以培養你嘅紀律性同耐性，定期儲蓄可以幫你建立長期嘅財務計劃，學識控制開支，避免衝動消費，而且如果你有儲蓄，就可以提供一定嘅心理安全感，令你面對未來嘅時候唔會咁緊張，唔使因為金錢問題而感到焦慮。
不過又咁講，只係靠儲錢係唔足以令你致富，最主要嘅原因係受到通脹嘅影響，因為儲蓄嘅利息通常都係低過通脹率，所以其實你放喺銀行裡面嘅錢每年都喺度貶值緊，長期嚟講會影響你嘅生活質素。
另外，如果將所有嘅資金都放喺銀行，即係意味住你放棄咗其他潛在嘅投資機會，投資可以為你創造額外嘅收入，但係儲蓄就等同於將啲資金儲存喺一個地方，根本冇辦法令到個資本增值，所以真正嘅財富增長係需要透過投資嚟實現。
如果你想真正致富，就必須考慮去投資，投資先可以將你嘅資金增值，最常見嘅投資方法就係買賣股票，股票市場嘅長期回報率通常都可以高過儲蓄嘅利率，透過買賣唔同公司嘅股票，你可以分享嗰間公司嘅增長同利潤，獲得潛在嘅資本增值同股息嘅收入，如果你喺選擇投資邊隻股票嘅時候覺得太複雜，你可以選擇考慮投資唔同類型嘅基金，基金由專業嘅經理管理，可以幫你分散風險，達到更穩定嘅收益回報，另外一個最常見嘅投資項目，就係買樓收租，如果成功租出你所買入嘅物業單位，你就可以有穩定嘅租金收入，而且物業嘅價值亦都有可能會上升，從而帶嚟資本嘅增值。
當然，仲有一個潛在嘅致富途徑就係創業，如果你自認有創業嘅精神，唔怕失敗同蝕本，你可以去嘗試開創自己嘅業務，雖然創業嘅風險相對地都比較高，但係如果創業成功，業務上咗軌道之後，佢嘅回報往往都非常可觀，被動收入不斷增加，達至財務自由。
除咗儲蓄同投資之外，大家都唔可以忽視其他嘅理財策略，咁樣先可以幫助你真正致富，例如你要持續咁提升自己嘅技能，無論係專業知識定係財務管理，咁樣可以增加你嘅收入潛力，另外你一定要識得為自己制定預算，合理規劃每個月嘅開支，避免不必要嘅消費，咁樣能夠幫你慳到更多嘅資金，從而用嚟儲蓄或者投資，增加更多收入。
總結嚟講，單靠儲錢係冇辦法致富，儲蓄固然重要，但你係更加需要將注意力放喺投資同理財上面，透過合理嘅財務規劃，配合儲蓄、投資同持續學習，先可以真正實現財務自由，達到致富嘅目標，而致富嘅關鍵就在於點樣有效咁管理同運用你嘅資金，而唔係單純將佢哋放喺銀行裡面，只要你好好運用多元化嘅理財策略，咁就可以應對到未來唔同嘅挑戰，實現自己嘅財務夢想。
唔知你對以上嘅內容又有啲咩睇法？歡迎留言，我哋下集見。
Olivia
香港的士交易所 HKTEx 主播
2024年10月25日
P.S.：詳細短片版本請於YouTube上收看：https://youtu.be/GijAtSr1q-Q
Comments