Hello 大家好，我係Peter，今集嚟到Part 3，我哋繼續回應大家嘅留言，如果錯過咗之前Part 1同Part 2嘅朋友，可以先去返我哋嘅Channel重溫返先，未訂閱我哋嘅朋友，記得訂閱喇，多謝支持！
講返個情況先，我哋之前喺社交媒體出Post問大家「你認為的士牌仲值得投資嗎？」，我哋收集咗好多唔同嘅意見同睇法，今集我哋嘗試繼續回應大家嘅留言，當中有網民留言講到：「呢排加息中，的確唔夠做定期吸引」。
好！等我喺度嘗試同大家分析一吓當中嘅細節，先講一講加息嘅情況先，由於現時美國通脹持續高企，為咗對抗通脹，美國嘗試透過加息去解決高通脹問題，由於香港喺1983年起，實施咗聯繫匯率制度，港元同美元有一定嘅掛勾，如果美國持續加息，大量資金流向美元，令美元強勁，為咗確保香港貨幣金融穩定，香港亦要有資金去保持聯繫匯率制度，所以香港會因應情況加息去吸引資金流入。
近期我哋見到香港銀行亦相繼加息，咁到底加息又對的士牌有啲咩影響呢？等我喺度嘗試同大家分析一吓，其實加息，最主要係增加咗的士按揭貸款嘅成本，每月還款嘅金額增加咗，供款壓力增加，會令某部份車主決定放售的士牌套現，的士牌價亦會有下跌嘅壓力，不過有一點大家一定要知道，本身市場上的士牌嘅數量唔算太多，只係有18163個，而且當中有好多車主都已經供斷咗，又或者買嗰陣已經全數Fullpay買起咗，所以加息對呢班車主嚟講可以話係冇任何壓力，只係喺資產價值個帳面上有所下跌，唔多唔少心理都會有少少影響，但係大家唔好過份高估咗加息對的士牌價嘅影響。
近期我哋香港的士交易所都發現，買家都偏向於用高首期又或者Fullpay方式去購買的士牌入市，咁樣可以有一定程度對抗牌價下行壓力，亦都可以令自己供款壓力減到最低，有一定實力嘅買家，不妨可以參考吓。
至於網民提到「的確唔夠做定期吸引」，我哋就嘗試睇吓當中嘅比較，冇錯嘅，做定期勝在夠穩陣，而且簡單易明，有唔少穩健嘅投資者都會用呢種投資工具嚟收息，以現時銀行港元定期存款嘅情況 (資料截至2022年12月12日)，假設存款金額為100萬，做6個月嘅定期，息口大約介乎3.8%至5%左右，至於以一個總資產價值400幾萬嘅市區的士牌嚟計算，佢嘅租金年回報大約有4.8%，當然，呢一個回報率，係仲未減除營運的士嘅成本，但值得留意嘅係，要喺市場上搵一樣咁大額嘅資產，而銀行係願意接受按揭貸款申請，我諗除咗物業之外，的士牌就係另一個選擇，所以有好多時投資者購買的士牌，實際只係俾咗大約100萬嘅首期，如果以投資金額100萬黎計算，佢個租金回報率可以超過20%以上。
至於資產價值嚟睇，做定期係屬於一個保本嘅投資，佢嘅資產價值唔會因時間而改變，大家要明白，跟隨時間嘅過去，同等價值嘅金額，佢嘅購買力好大機會會下降，所以做定期雖然話保本，但係就要好睇個利息追唔追到通脹。
至於的士牌嘅價值，就會因應市況而調整，而的士收貴同埋租金水平好多時都係根據通脹而有所上升，從而帶動佢嘅資產價值，所以我個人應為做定期同埋投資的士牌係屬於兩種好唔同嘅工具，適合唔同嘅投資者選擇，兩樣嘢好難做比較，唔知大家又有咩睇法呢？歡迎留言！
我哋一連3集，回應大家嘅留言，同大家分享咗我哋對的士牌市場嘅睇法，如果想進一步了解更多資訊，歡迎隨時聯絡我哋嘅團隊，我哋下集見！
Peter Tseung
香港的士交易所 HKTEx (業務部) - 副總裁
2022年12月21日
P.S.：(短片版本將於稍後推出！敬請留意！)
#的士牌價 #投資的士 #買賣的士牌 #的士司機 #的士生意 #白牌車 #Uber #社會運動 #疫情 #的士保險 #泰加保險 #美國加息 #加息 #投資的士回報 #投資回報 #加息 #定期 #通脹 #聯繫匯率制度 #聯繫匯率 #美元 #港元
Comments