大家好，我係Hayley，啱啱踏入咗2025年，我哋香港的士交易所就襯呢個機會，同大家回顧一吓2024年的士牌價嘅走勢，再同大家展望一吓嚟緊2025年的士牌價嘅情況，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。
2024年嘅的士牌價可以形容為面對緊災難風暴，牌價走勢嘅表現好唔理想，第二季尾段更加出現咗急跌嘅情況，我哋就睇返2024年的士牌價嘅走勢圖，市區的士牌價，由年頭357萬下跌至年尾285萬，全年下跌咗72萬，下跌咗20%，至於新界的士牌價，就由年頭293萬下跌至年尾205萬，全年下跌咗88萬，就大約下跌咗30%。
其實的士牌價喺2024年繼續下跌，仍然係受到多方面嘅因素影響，我哋先講一講的士生意嘅情況，根據運輸署嘅數據，現時平均每日公共交通乘客人次趨勢仍然未能夠回復到疫情前嘅水平，呢個亦都反映緊市民喺疫情後改變咗生活習慣，減少咗夜市活動出行嘅情況，另外亦都受到最近兩年不斷興起嘅港人北上消費熱潮嘅影響，本港食肆同零售行業步入寒冬，紛紛出現結業潮，情況令人擔憂，呢啲都會影響市民日常出行嘅意欲，直接影響緊的士嘅生意，試問咁嘅情況的士牌價又點會唔受影響呢？
另一個令今年的士牌價下跌嘅因素，就係高息嘅環境仍然持續，受到美國聯儲局由2022年3月開始嘅加息周期影響，本港息口仍然一直處於一個高嘅水平，直接影響的士按揭貸款嘅成本，令到準買家入市嘅決定變得更加審慎，亦都令本身做緊按揭嘅車主供款感到壓力，直到今年2024年9月份美國聯儲局先正式啟動減息周期，情況先叫做得以舒緩。
另一個唔可以唔提嘅因素就係的士保險費高昂嘅問題，其實的士保費最近幾年都不斷上升，今年亦都唔例外，令車主營運的士嘅成本增加咗好多，導致部分車主決定退市離場，增加咗的士牌價嘅下行壓力，以上幾點都係今年的士牌價下跌嘅因素。
不過講到今年的士牌價下跌嘅最主要因素，亦都係直接令到牌價6月尾急跌嘅原因，可以形容為的士牌災難風暴嘅風眼，就係城中熱烈討論嘅話題「白牌車合法化」，政府喺2023年嘅年尾已經提出，將會喺半年內為修例規管網約車平台提出建議，由於原先大家都預期政府會喺7月份正式公佈立法修例嘅建議細節內容，呢個情況令部份的士車主擔心，的士牌會失去佢嘅獨特價值，決定提早沽售的士牌離場，令6月份的士牌價出現咗急跌嘅情況，但當局喺7月頭發表嘅規管網約車平台研究佈告當中，未有實際嘅法例政策推出，表明需要更多嘅時間去研究，預計要去到2025年先會定出立法嘅建議內容，所以的士牌價先有所回穩。
我哋再回顧返2024年下半年，其實當中都有唔少關於的士嘅新政策出台，先有7月中的士正式加價，市區的士嘅起錶價加咗HK$2，由原本HK$27加到HK$29，加價長遠係有助提升的士司機嘅收入，另外，政府喺7月尾就發出咗5個的士車隊牌照，並且預計會喺一年內正式投入服務，的士車隊會提供網約平台、電子支付系統以及司機培訓等等，長遠有助提升的士服務質素同形象，另外同樣都係為咗提升的士服務質素嘅新政策喺9月份推出，就係的士司機違例記分制已經喺9月22號正式生效，如果的士司機作出濫收車資、拒載又或者兜路嘅種種行為就會被記分，如果司機兩年內被記滿15分就會被停牌，最後，政府喺12月份更加提出建議立法修例強制所有的士安裝攝錄系統同提供電子支付服務，預計會喺2026年內完成，以上嘅政策都係長遠能夠有助改善整體的士嘅服務質素，呢啲都係大家值得關注對於的士牌價嘅利好消息。
但係既然2024年下半年有咁多利好的士牌價嘅消息出現，而且減息周期亦都開始咗，但係點解的士牌價喺下半年都係冇咩上升？相信最主要嘅原因在於困擾咗的士行業接近十年嘅網約白牌車問題遲遲都未解決，而政府亦都預計需要等到2025年先會定出立法修例規管網約車平台嘅建議內容，大家都唔知到時會唔會真係出現「白牌車合法化」，所以呢方面就令到的士牌嘅價值仍然存在不確定性，導致牌價未有大幅回升嘅主要原因，所以呢個亦都係2025年大家一定要關注嘅重要消息，絕對係的士牌價嘅關鍵轉捩點，我哋一定會第一時間同大家報導最新情況。
咁嚟緊2025年仲有啲咩消息係大家值得關注？首先，大家可以繼續留意息口嘅走勢變化，隨住特朗普將會喺1月正式上任美國總統，經濟學家普遍認為，特朗普嘅政策可能會為美國帶嚟高通脹，相信咁樣會令到美國聯儲局喺未來嘅減息決策之中變得更加謹慎，從而減少減息嘅頻率同幅度，所以大家唔能夠對減息抱有太大嘅期望，呢點大家要留意。
另外大家可以留意吓2025年的士服務嘅改善情況，的士車隊將會喺2025年陸續正式投入服務，期望可以提供更優質嘅的士服務，提升的士嘅生意，同時政府亦都預計會喺2025年立法強制所有的士安裝攝錄系統同提供電子支付方式，相信會有效提升整體的士服務質素，大家都值得關注。
最後有一個消息唔可以唔提，就係2024年12月百度旗下嘅無人駕駛的士「蘿蔔快跑」已經正式喺香港機場一帶嘅特定路段進行首階段嘅測試，隨住科技嘅發展，無人駕駛的士絕對會係未來發展嘅新方向，至於對的士牌價嘅影響係好定係壞，仍然有好多未知之數，詳細嘅分析大家可以睇返我哋頻道之前有關「無人駕駛的士」嘅評論短片，呢個絕對係大家未來必需留意嘅重要消息。
雖然近年的士牌價不斷尋底係一個不爭嘅事實，不過又咁講，的士牌呢種資產，可以自行營運賺錢，亦都可以出租收取租金回報，自然吸引到投資者去持有，嚟緊的士牌價會暴跌跌到一文不值，定係會爆升重拾上升軌跡？大家可以拭目以待，記得緊貼我哋香港的士交易所，一有最新消息我哋會即時同大家報導。
唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Hayley
香港的士交易所 HKTEx 主播
2025年1月3日
P.S.：詳細短片版本請於YouTube上收看：https://youtu.be/dIOqlv41rFc
Comments