大家好，我係Karina，全港的士喺早前2024年7月14號起正式加價，頭2公里嘅起錶價加HK$2，其後頭段跳錶每跳加HK$0.2，後段跳錶每跳就加HK$0.1，以市區的士為例，起錶價就由原本HK$27，加至HK$29，加幅大約7.4%，我哋就趁住呢個機會同大家睇吓的士加價嘅歷史，如果仲未訂閱我哋嘅朋友，記得訂閱，多謝支持。
我哋就先同大家睇一睇，過往五十年市區的士起錶價走勢圖，即係由1974年至到今年2024年間，市區的士紅的嘅起錶價變化，由1974年當時起錶價只係HK$2，五十年期間總共加價20次，至今加至HK$29，加幅超過13倍，而當中最值得留意嘅情況就係，喺1998年至2008年呢十年期間，市區的士係一直冇加過價，保持當時嘅收費，當時市區的士紅的嘅起錶價係HK$15，直至2008年就一年內加咗兩次價，2008年2月28號由HK$15加到HK$16，之後同年2008年11月30號就由HK$16加到HK$18。
咁我哋再集中睇一睇最近十年市區的士起錶價嘅變化，由十年前2014年市區的士紅的起錶價HK$22，到最新今年2024年7月14號加至HK$29，十年內加咗HK$7，加幅大約31.8%，我哋同一時間再睇一睇過往十年香港嘅通脹率走勢圖表，經過我哋計算之後，呢十年香港累計嘅通脹升幅大約24.7%，即係假如你十年前要用HK$1,000買到嘅嘢，十年後嘅今日就要大約用HK$1,247先至買到，如果對比返市區的士起錶價最近十年嘅加幅31.8%，市區的士起錶價呢十年算係跑贏通脹。
最後我哋一次過睇晒3種的士喺過往五十年嘅起錶價走勢圖，喺個圖表我哋可以睇得到，其實3種唔同的士嘅加幅走勢都差唔多，當中新界的士嘅起錶價就由1976年起嘅HK$1，期間總共加價20次，最新加到現時2024年嘅HK$25.5，至於大嶼山的士嘅起錶價就由1983年起嘅HK$3，期間總共加價16次，最新加到現時2024年嘅HK$24。
以上嘅資訊俾大家作為參考嘅數據，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Karina
香港的士交易所 HKTEx 主播
2024年7月16日
P.S.：短片版本請於YouTube上收看：https://youtu.be/-ETuiprFnuM
Comments