Hello 大家好，我係Peter，呢集主要回應返觀眾嘅留言，之前我哋都拍過幾條片講解有關Uber對的士業界嘅影響，見到有啲觀眾留言話：「點解唔講吓啲折扣的士？」。冇錯！所以我哋今集就同大家講吓【折扣的士對的士業界嘅影響】，無論你係乘客或者司機，車主或者車行都好，好應該睇吓呢編文章，了解一吓「折扣的士」到底係咩一回事。仲未訂閱我哋Channel嘅朋友，記得訂閱喇，多謝支持！
要了解「折扣的士」，我哋先了解吓佢嘅由來，喺2003年嗰陣，由於香港經濟轉差，的士生意減少，同時又有大批嘅失業人士轉做的士司機，導致市場供求失去平衡，所以有啲的士司機諗住用減價嘅方法去吸引乘客搭車，但係法例係並唔容許的士司機唔按錶收費嘅，所以司機就利用咗法例上嘅灰色地帶，折扣議價由乘客提出，經司機及乘客雙方同意，咁樣並無法例禁止。
由於早期只係有少數嘅的士司機接受唔按錶收費，所以乘客當遇上呢類司機嘅時候，都會記低司機嘅聯絡方法，方便日後Call車，所以就係坊間流傳咗好多「公開嘅秘密」，就係Call「八折的」嘅電話號碼，從而衍生出越嚟越多嘅「八折黨」。
根據本港法例第374D章《道路交通（公共服務車輛）規例》內嘅附表5訂明，的士司機需要按錶收費，唔可以以較低車資去招攬乘客。另外，《條例》第40條亦都訂明咗，司機唔可以以任何嘅方式，誘使乘客使用佢嘅車輛，即是唔可以「兜客」，最高可以被罰款1萬元及監禁6個月。
隨住時代嘅發展，現時大部份Call的士服務，都利用手機App嚟進行，坊間亦都有出現咗一啲手機App以「折扣的士」做招徠嚟吸引乘客使用，而另外有其他Call的士App就利用法例嘅灰色地帶，俾乘客係App內好方便咁就可以提出「折扣」嘅要求。
事實上，政府係之前都解釋咗好多次，如果的士司機提供車費折扣做招徠，無論係利用App、電話、或者其他方式，都已經屬於「兜客」行為，即屬違法。 而另一方面，根據《條例》第48條訂明，乘客意圖逃避繳付佢應付嘅「合法車費」，即屬犯法，一經定罪，可被罰款$3,000及監禁6個月，但係法例就冇講明禁止乘客議價，只有指明司機係可以依法拒絕乘客任何減收車費嘅要求，所以呢度就存在咗一個法例嘅灰色地帶，亦都令到執法部門好難對「折扣的士」嘅違法行為作出檢控。
講返今集嘅主題先，就係「折扣的士對的士業界嘅影響」，首先，我哋要諗一諗點解「折扣的士」咁多年嚟都一直存在，有人會答我係「供求問題」，話係由於本身的士缺乏生意，所以唯有用減價嚟吸引乘客，從而做多啲生意，但係我個人就唔係咁認同呢個睇法，因為「折扣的士」首先已經破壞咗的士收費原則，引發行內混亂同埋不公平競爭，另外，「折扣的士」重點破壞的士業界嘅原因就係，佢有一個「惡性循環」嘅後果，當的士市場上越嚟越多司機做「折扣的士」嘅時候，你就會發現，越嚟越多乘客Call「折扣的士」，因為乘客已經習慣咗搭的士一定會有折扣，有啲乘客甚至會提出更低嘅折扣要求，久而久之，會令更多司機嘗試做「折扣的士」，而正價嘅的士生意就會被蠶食，整個嘅的士市場利潤亦都會大幅減少，從而令的士服務質素下降，減慢的士市場發展步伐。
以上嘅情況，我絕對冇誇大到，事實上情況真係咁樣，不過係乘客嘅角度係唔會理呢啲嘢，有著數有優惠就可以，所以我呢編文章主要都唔係俾一般嘅乘客睇，如果你只係一位的士乘客，而你又睇到呢度，好多謝你嘅支持，好希望你可以大約了解「折扣的士」係咩一回事，之後可以幫襯返正價的士。
其實我呢編文章最主要係想俾的士業畀嘅人士睇，希望大家明白，我唔係想阻大家做生意，我亦都明白我冇可能叫到業界同心一齊唔做「折扣的士」，我只係想業界大家知道，做「折扣的士」唔係只係關乎你做多幾支單嘅問題，其實個影響係好深遠嘅，唔好因為覺得多你一個唔多，少你一個唔少，如果大家司機都可以堅持做返正價，其實的士生意係可以好好做。
至於果啲Call的士App嘅開發商，如果你哋真係為的士業界好，希望係你哋嘅Call車App內唔好有折扣價嘅選項俾乘客揀，亦都唔好咁容易俾乘客係備註上面寫折扣字眼。
其實如果真係想提升的士生意，可以從服務質素著手，提供方便快捷嘅Call車服務，建立乘客關係，提升乘客忠誠度等等。相信大部份嘅的士乘客，都係想有方便快捷、舒適安全嘅的士服務，多過只係想有平價優惠嘅的士服務。
呢編文章我都只係想出少少力，回應一下「折扣的士」嘅問題，了解我哋香港的士交易所對呢一方面嘅睇法，希望所有的士業界嘅朋友都可以反思一下，做出正確嘅選擇。
今集就同大家講到呢度，記得訂閱我哋，我哋下集見！
Peter Tseung
香港的士交易所 HKTEx (業務部) - 副總裁
2022年8月13日
P.S.：(短片版本將於稍後推出！敬請留意！)
Comments