Uber攻港6年半來，在屢遭放蛇、的士業圍攻、法例不容下，爭取合法經營之路渺茫，去年10月推出Uber Taxi作「最後殺著」。《蘋果》發現，Uber連月來以低抽佣、額外獎金等優惠，成功吸納過千名的士司機及車行加入，開始進佔的士市場。不少Uber私家車司機直斥Uber厚此薄彼，偏離「共乘」理念，擔心Uber將來以Uber Taxi取代私家車。另有Uber熟客表明不會改乘Uber Taxi，「的士唔會因為咁而服務態度好咗。」立法會議員估計，Uber私家車長遠會因政府加強監管被淘汰，形容推出Uber Taxi是「馬死落地行」。Uber否認，強調兩類車種同樣重要。
記者：黎敬中 馮智敏 龔蕙芝 周子惇
屢受政府打壓的Uber為開拓客源，前年3月曾推Uber Flash，乘客會被配對至Uber X或的士，被視為與的士合作的第一步，當時卻遭的士業反對，直言「沒有合作空間」，反指合作即變相承認白牌車合法。至去年10月底，Uber再推Uber Taxi，正式讓乘客選乘的士。
「依家九成九係Uber（客），今日做咗兩單街客啫。」的士司機偉哥上年8月兼接Uber訂單後，不時「單接單」做個不停，平均每日有逾20張Uber訂單。Uber為鼓勵的士司機加入，只對Uber Taxi抽10%佣，遠較旗下私家車25%至28%低；完成足夠訂單的司機，甚至可獲豐厚獎金，「（上星期）做咗超過100個order，就獎咗6,000蚊獎金。」
偉哥指若只做街客，疫情下月入大跌一半至不足2萬元，「喺條街遊來遊去都冇客。」直至兼職Uber私家車的太太介紹他加入Uber Taxi，連同額外獎金，收入即大增至近5萬元，就連太太亦抱怨指收入不及他好。
另一Uber Taxi司機達叔亦承認，現時七成生意來自Uber，笑指Uber「自己搶自己生意」，他透露以往的士車行反對Uber在港營運，怕被搶生意，現時卻「調返轉係的士同Uber合作」，為旗下司機申請加入Uber。的士司機小明則指自疫情後，的士在的士站大排長龍，生意凋零，但加入Uber後，收入變得穩定。「因為疫情我哋司機先肯做，希望賺得一蚊得一蚊，反正你都係坐喺度，咪平啲都做囉。」
Uber大舉改攻的士市場，除以銀彈吸納司機加盟，亦以較低車資吸引搭客，每程車費比私家車便宜，以馬鞍山前往將軍澳為例，的士起錶收費約186元，Uber X約收166元，而Uber Taxi則只需156元。
不少旗下私家車司機對此不滿，甚至已計劃轉行。20歲的嘉榮全職駕Uber兩年，認為市民不想搭的士才選Uber，「佢偏偏整個咁嘅嘢（Uber Taxi）出嚟，多咗競爭……（生意）分薄咗囉」。若重新選擇，他直言會改駕Uber Taxi，因福利較多，「我哋就捱生捱死。」仍在供車的他坦言Uber訂單不斷減少，「甩咗架車就搵份full-time做。」
Uber司機Ben就估計，約兩成客人因車資便宜轉乘Uber Taxi，怒斥Uber「冇諗過我哋嘅司機囉！」他認為「共乘」為Uber當初理念和賣點，因受的士業打壓，便推出Uber Taxi「討好佢、畀着數佢」，擔心Uber終只集中營運Uber Taxi，放棄私家車生意。
立法會議員田北辰透露，大半年前已向Uber建議與的士業合作，但疑因Uber要求分成太高而作罷，他估計Uber最終肯調低分成，「如果唔讓步，依家死㗎喇，佢香港市場要退出㗎喇，冇得撈。」他解釋的士業反對力量太大，現行法例又不容Uber經營，故Uber必須考慮與的士業合作，「講得難聽啲，馬死落地行，佢（Uber）放棄晒成個市場，咁不如（與的士業合作）賺少啲。」。
而且在疫情下是雙方合作的最好時機，「依家好多的士都冇工開㗎嘛，如果Uber令到佢哋個daily intake（日收入）可以令車主同司機滿意，咁佢（的士業）死撐做咩啫。」田認為，近月Uber發展的士業務，可助維繫香港業務，但估計長遠會淘汰Uber私家車，「點做啫，成日畀人放蛇，個個（司機）心驚膽跳。」
對於Uber發展的士業務，不少熟客有保留，「的士唔會因為咁服務態度好咗。」搭客Tom指，Uber吸引在保證有車、服務態度良好、可體驗搭乘不同私家車，如純粹貪平，可電召「8折的」，除非平30至40%才選搭Uber Taxi。蔡小姐則指全因不想坐的士才選搭Uber，「的士態度又唔好，寧願貴少少舒服啲。」直言不會改選Uber Taxi。
每周3次坐Uber的佘小姐指，雖然Uber Taxi車資較便宜，但認為Uber私家車較穩陣，「確保有車同唔會兜路。」暫不考慮使用的士服務，除非在非繁忙時間Uber Taxi有車提供，或會嘗試。
Uber公共政策主管Richard Willder指，全港約1.8萬部的士，當中過千名的士司機已加入Uber。的士和私家車業務「完全沒有任何程度的相互侵蝕（cannibalization）」，否認的士業務是「救生繩」，兩種車都十分關鍵。他承認為的士司機提供「獎勵」，惟最初推廣私家車時有同樣做法，已調整兩者分成差距。
被問到是否因去年9月非法取酬案終極敗訴，而於10月推出的士業務，他指經長時間考慮和分析市場數據後才推出，與判決無關。他對政府至今取態感失望，稱研究顯示港人對Uber需求殷切，望可與當局對話，「我們知道需要作出妥協……但我們已準備好，而且十分願意溝通。」
運輸署發言人指，政府鼓勵不同應用科技的使用，包括網絡或手機程式召喚出租汽車，惟載客取酬行為須合乎法規。對於Uber Taxi會否涉及違法行為，署方沒有正面回應，僅指在現行法例下，的士除了可以按錶收費，亦可以提供預約的包車服務，包車服務收費由提供和接受服務雙方自行議定。
圖片：蘋果日報
原文資料來源：
Comments