大家好，我係Olivia，近日有新聞消息指出，小巴牌嘅牌價由2011年高位780萬跌至現時大約70萬，暴跌九成，懷疑有本地嘅銀行開始向小巴車主採取俗稱「Call Loan」嘅提早收回按揭貸款行動，但事後香港的士小巴商總會發出聲明，指出只係有某啲小巴車主出現咗斷供嘅情況，而令到小巴被銀行拖走，否認今次絕對唔係小巴牌價下跌或其他原因令銀行主動Call Loan而引致拖車，消息一出亦引起網民嘅熱烈討論，咁到底的士車主又會唔會俾銀行Call Loan嘅呢？
根據我哋本台向某銀行嘅的士按揭部職員查詢，銀行會唔會向的士車主Call Loan呢？得到嘅答覆係會的，銀行係有機會向的士車主Call Loan提早收回按揭貸款，佢哋形容同樓宇按揭嘅制度情況差唔多，不過我哋一定要知道，如果唔係去到最壞嘅情況，其實銀行一般都唔會隨便Call Loan，實際情況係就算的士牌價有所下跌，出現咗負資產嘅情況，如果的士車主仍然可以準時供款，喺一般嘅情況下，銀行都唔會主動向車主Call Loan，除非車主不斷出現斷供嘅情況，或者銀行認為車主欠債嘅情況將會出現重大嘅風險，銀行就有機會向車主採取Call Loan行動，要求車主必需喺限定日期前還清所有嘅欠款，否則銀行可以採取相應嘅行動，將的士收回拖走，當然，會唔會Call Loan嘅最終決定權係喺銀行度，而且每間銀行嘅政策制度都可能會唔同，呢點大家都要知道。
所以講到尾，如果你係的士車主，而且你喺購入的士嘅時候向銀行申請咗的士按揭貸款，只要你有準時供款，都唔需要太擔心會俾銀行Call Loan。
唔知你對以上內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Olivia
香港的士交易所 HKTEx 主播
2024年2月21日
P.S.：短片版本請於YouTube上收看：https://youtu.be/rJSukYT7qWw
コメント