top of page
香港的士交易所 HKTEx
2023年9月11日

專題探討【打風黑雨車保包唔包？】


大家好，我係Olivia，香港每年嘅7至9月都係打風嘅季節，颱風，黑雨等等嘅惡劣天氣都會接踵而嚟，喺惡劣天氣嘅環境之下，絕大部份嘅的士都會停止營運，停泊喺停車場或路邊車位，但當然仍然有一啲獨立嘅車主或司機冒險開工營業，一旦撞車又或者泊喺路邊時汽車有損毀，而坊間有唔少人都話喺惡劣天氣嘅情況下揸車，保險公司係唔會承擔責任，咁究竟保險公司會唔會就呢啲情況作出賠償呢？今集我哋香港的士交易所就會同大家專題探討一下，保險公司喺決定會唔會賠償嘅時候會考慮啲咩嘅因素，如果仲未訂閱我哋頻道嘅朋友，記得訂閱，多謝支持。


首先，我哋先了解下車保嘅種類，第三者責任保險，俗稱「三保」，根據香港法例，任何道路使用者都須要購買有效嘅第三者責任保險，第三者責任保險嘅涵蓋範圍細，通常只係保障第三者財物損失同埋第三者死亡或身體受傷，所以如果發生意外嗰陣，自己架車嘅損毀係無辦法向保險公司索償。


至於綜合汽車保險，俗稱「全保」，係車主自願性購買嘅汽車保險，佢嘅保障範圍擴張至三保以外，涵蓋投保者自己架車，以及喺惡劣天氣下，即係例如喺8號風球或黑雨嘅情況下，所造成嘅人命傷亡同埋財物嘅損失等等，即係無論你架車係喺停泊嗰陣時俾重物或冧樹壓毀，或者玻璃窗俾大石打爆，甚至係成架車俾強風吹走都好，保險公司都會按維修費實報實銷，如果你架車俾水淹沒而導致全車報廢嘅話，保險公司通常都會按照折舊後嘅市價賠償，至於折舊嘅計算方式，通常都係睇車齡同行車里數等因素而決定，當然，如果車主係打算向保險公司索償嘅話，車主係需要繳付相關嘅墊底費，而且因為車主嘅索償，投保人嘅NCD無索償折扣都會被扣減，至於明年嘅車保保費亦都有機會會增加。


至於保險公司喺考慮會唔會賠償嗰陣，其中一個最重要嘅因素就喺車主或司機係唔係已經盡力採取一切合理嘅步驟，去保障架車免受惡劣天氣破壞，例如司機明知前面水浸都仍然要冒險強行衝過，又或者專登揸架車去海邊睇浪追風等等，呢啲就係未盡力保障車輛嘅行為，如果保險公司認為車主或司機係故意令到架車陷入險境，佢哋可能會拒絕賠償，所以車主同司機都唔應該抱有買咗保險之後就唔顧路面危險嘅心態。


至於點樣保障架車免受惡劣天氣破壞嘅方法，當中包括：第一，除非極為必要，否則應該避免喺惡劣天氣嘅情況下揸車，第二，能見度低嘅時候，應該開著車頭大燈，第三，避免停泊喺容易水浸或山泥傾瀉嘅地方，第四，確保所有車窗同車門係已經關好，不過大家一定要留意，以上嘅資訊只係俾大家作為參考，由於唔同嘅保險方案嘅保障範圍都有機會唔同，大家最好細心咁閱讀你嘅保險文件內嘅條款細則。


咁今集就同大家講到呢一度，唔知你又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx」 一站式的士買賣租賃平台，密切留意我哋香港的士交易所，我哋下集見。


Olivia

香港的士交易所 HKTEx 主播

2023年9月12日

P.S.：短片版本請於YouTube上收看：https://youtu.be/nRcIhUlQn1U



341 次查看

Comments

bottom of page