大家好，我係Hayley，上星期同大家講解有關的士加價嘅歷史情況，有觀眾朋友留言提及想了解一吓的士乘客量呢一方面嘅數字，所以今集就同大家睇一睇有關的士乘客量嘅情況，另外仲會同大家簡單分析一吓導致的士乘客量下跌嘅唔同原因，未訂閱我哋嘅朋友，記得訂閱，多謝支持。
我哋先睇一睇由運輸署提供嘅數據，由2000年至2023年呢二十三年間，每年的士乘客人次統計圖表，喺呢個圖表我哋可以睇得到，喺2000年時期，每年嘅的士乘客總人次大約維持喺3億5千萬人次水平，2007年最高峰更加去到大約4億人次，其後每年都係大致保持喺3億5千萬人次水平，直至2015年開始有下跌嘅趨勢，的士乘客人次跌至2023年只有2億6千6百萬人次水平，呢8年間就大約下跌咗25%，咁到底係咩原因導致的士乘客量不斷下跌嘅呢？
其實喺同一時期，Uber喺2014年正式進入香港，並且喺2015年大肆宣傳，吸引私家車司機經佢哋嘅平台載客取酬賺錢，根據Uber香港區總經理鍾志霆喺今年2024年6月接受傳媒訪問嘅時候表示，現時活躍嘅Uber私家車司機有超過一萬人，如果比較起現時活躍嘅的士司機4萬人，比例大約係一比四，相信呢8至9年間的士乘客量不斷下跌，最主要嘅原因莫過於非法載客取酬嘅活動日漸活躍，至於到底實際有幾多的士乘客被搶走，就冇辦法有實質嘅數字去研究。
另外，的士乘客量下跌嘅原因係唔係只有呢一個？答案緊係唔係，如果我哋細心睇吓個每年的士乘客人次統計圖表，你就會發現的士乘客量按年跌到最低係喺2020年，跌到只有2億4千1百萬人次，其實當年正正就係受到疫情肆虐嘅影響，全球封關封城，市民出行活動大減，我哋再同大家睇一睇另外一個運輸署嘅統計圖表你就會更加清楚明白，平均每日公共交通乘客人次趨勢，呢個數字係包括所有公共交通工具嘅乘客人次，由當年2019年1月份大約平均每日有1300萬人次水平，跌至2020年年頭大約平均每日只有700萬人次水平，其後慢慢逐步回升，不過一直都未回復到疫情前嘅水平，截至最新2024年4月份嘅數據，平均每日公共交通乘客人次大約有1100萬，比起疫情前嘅1300萬水平下跌咗大約15%，所以最近幾年的士乘客量下跌嘅原因某程度上係受疫情嘅影響有關，唔單只係的士乘客量下跌，係連所有嘅公共交通乘客量都有所下跌。
不過除咗以上兩個因素影響的士乘客量之外，另外有一個因素我哋絕對唔能夠忽視，就係政府為咗有效減少道路交通擠塞對市民出行嘅影響，政府喺發展交通運輸嘅方向係會主力發展集體運輸交通系統，即係鐵路同輕鐵等等，隨住鐵路系統不斷發展，的士乘客佔整體公共交通總乘客比例近年都不斷下跌，我哋睇一睇的士乘客比例走勢圖表可以睇得到，由2000年佔整體公共交通總乘客比例大約9.28%，跌至最新數據2023年只有大約6.35%，最近二十幾年有向下嘅趨勢，反映市民出行趨向於改搭的士以外嘅公共交通工具，影響咗的士嘅乘客量，相信呢個亦都係的士乘客量下跌嘅其中一個因素。
以上就係今集想同大家分析嘅3個的士乘客量下跌原因，至於其他原因例如的士服務質素、車款新舊同埋電子支付落後等等嘅問題，我哋唔喺今集同大家詳細分析，只係期望日後的士車隊成立之後會為的士行業帶嚟轉變同改善。
唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Hayley
香港的士交易所 HKTEx 主播
2024年7月24日
P.S.：短片版本請於YouTube上收看：https://youtu.be/UEqmKvFfksM
Comments