2024年9月份的士牌價走勢圖
top of page
最新市場動態
已更新：10月2日
大家好，我係Teresa，美國減息係全球金融市場中一個好重要嘅事件，對全球資產價格嘅影響深遠而且多元化，當美國聯邦儲備系統即係美聯儲降低利率嘅時候，通常會引發一系列經濟同市場嘅反應，以下就係一啲主要嘅影響。
第一個影響，就係會令資產價格上升，減息通常會令借貸成本降低，企業可以更平價咁融資，呢樣會促進投資同提高盈利預期，所以投資者通常會對股票市場持樂觀嘅態度，導致股價上升，除此之外，低利率環境仲會令固定收益資產例如債券嘅回報率下降，進一步促使資金流入股票市場，推高股價，另外，減息仲會降低銀行嘅按揭貸款利率，令到買樓嘅成本下降，從而刺激房地產市場嘅需求，呢樣唔單止有機會再一次推高咗樓價，仲會促進咗 建築同相關行業嘅增長。
至於第二個影響，就係向高風險資產嘅轉移，喺低利率環境之下，投資者通常會尋求更高嘅收益，呢樣會促使資金流向風險較高嘅資產，例如新興市場股票、企業債券同其他替代投資，呢種資金流動可能會推高呢啲資產嘅價格，仲會增加市場嘅波動性。
而第三個影響，就係對外匯市場嘅影響，美國減息通常會導致美元貶值，當美國利率下降嘅時候，投資者可能會將資金轉移去其他國家嘅高收益資產，呢樣會引發對美元嘅需求減少，從而導致美元貶值，美元貶值對於以其他貨幣計價嘅資產，例如商品都會有所影響，因為呢啲資產對外國投資者嚟講變得更加平，從而推高佢嘅價格。
至於美國減息第四個影響，就係會影響到全球嘅資本流動，美國減息可能會令資金流出美國，流向其他國家同地區，特別係提供較高利率嘅市場，呢種資金流動將會有助於推高其他國家嘅資產價格，同時可能會對呢啲國家嘅貨幣產生壓力，導致資本外流。
最後要講嘅影響，就係對通脹預期嘅變化，低利率環境通常會引發通脹預期上升，因為低嘅借貸成本可能會促使消費同投資增加，進而推高需求，影響物價水平，呢種情況通常會促使投資者尋求以實物資產為主嘅保值投資，例如黃金，從而推高呢啲資產嘅價格。
總括嚟講，美國減息對全球資產價格嘅影響係多方面嘅，佢唔單止推高咗美國自己嘅資產價格，仲會引發咗資本流動、外匯市場波動同全球經濟關係嘅變化，投資者喺面對減息嘅時候，應該謹慎分析市場嘅趨勢，而且要考慮點樣喺呢種環境之下調整自己嘅投資組合，去應對潛在嘅風險同機會，呢種全球性影響嘅複雜性要求投資者保持警覺，靈活應對不斷變化嘅市場狀況。
唔知你對以上嘅內容又有啲咩睇法？歡迎留言，我哋下集見。
Teresa
香港的士交易所 HKTEx 主播
2024年9月25日
P.S.：詳細短片版本請於YouTube上收看：https://youtu.be/rXBE36t6NJk
大家好，我係Hayley，為咗有效提升的士服務質素，政府早前引入咗的士司機違例記分制度，而呢個制度就喺2024 年9月22號正式生效，喺記分制度下，如果的士司機濫收車資、拒載又或者兜路就會被記分，如果司機兩年內被記滿15分就會被停牌，有的士司機擔心會因為咁樣而同乘客會有爭拗，尤其係因為兜路嘅問題容易產生唔同嘅意見，亦都有的士司機認為新制度嘅懲罰太過嚴厲，另一方面乘客就希望呢個記分制度可以提高阻嚇作用，令的士服務質素能夠得以改善。
的士司機違例記分制度主要分為3個級別，列出咗11項影響的士服務質素嘅行為，例如其中拒絕發出收據就記3分，兜路就會被記5分，拒載同濫收車資就會被記10分，如果司機兩年內被記滿10分，就需要喺限期內自費修讀改進課程，否則會被罰款HK$5,000同監禁1個月，如果兩年內被記滿15分，更加需要停牌3個月，之後再被記滿15分就每次停牌6個月。
有的士司機喺接受傳媒訪問嘅時候表示，擔心會同乘客有爭拗，開工嘅時候都會盡量低聲下氣，亦都有的士司機認為記分制度只會影響一啲操守有問題嘅司機，但係就覺得相關嘅懲罰太過嚴厲，建議可以先警告後記分，同時亦都應該嘉許獎勵表現傑出嘅的士司機，而喺11項嘅記分項目當中，有的士司機就比較擔心兜路嘅問題容易引起爭拗，因為同一個目的地可能都有幾條路線可以到達，擔心就算跟住乘客指示嘅路線去行亦都可能出現爭拗，而且每次乘客上車之後，司機就需要喺極短嘅時間內諗好成個行車路線，所以有時司機走錯咗路都唔出奇，並唔係有心兜路。
喺另一邊廂，有市民就同傳媒分享自己搭的士嘅一啲唔愉快嘅經歷，例如遇到因為路程短而被拒載，又或者遇到的士司機聲稱唔識路而被兜路嘅情況，有市民表示唔希望遇到呢類嘅的士司機，以後如果遇到呢啲情況會視乎嚴重程度而考慮係唔係會去投訴，亦都有市民指出，新嘅記分制度實行之後對的士行業嘅信心增加咗，未來會考慮多啲乘搭的士。
另外，有的士業界就認為，喺的士車廂內安裝中央雲端攝錄系統係有佢嘅迫切性，咁樣有助保障的士司機同乘客嘅權益，的士車行車主協會永遠會長吳坤成喺接受傳媒訪問時表示，政府係有提及過喺的士車廂內安裝中央雲端攝錄系統，亦都有問過的士業界嘅意見，的士業界普遍全部都贊成，因為覺得咁樣會公道啲，同埋咁樣對乘客同司機都有多啲保障，政府會喺今年年底向立法會交代，吳坤成認為，如果喺呢個情況之下，既然的士司機違例記分制已經實施，咁盡快推行中央雲端攝錄系統係有佢嘅迫切性。
講到尾，引入的士司機違例記分制度目的都係為咗提升的士服務質素，雖然短時間會令的士司機增加咗一啲無形嘅壓力，但都希望能夠有周邊嘅系統配合去完善呢個記分制度，可以俾司機有個公平嘅環境去提升服務質素，從而增加市民搭的士嘅信心，令香港嘅的士業可以健康發展。
唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Hayley
香港的士交易所 HKTEx 主播
2024年9月23日
P.S.：詳細短片版本請於YouTube上收看：https://youtu.be/tE7UcDvUaNA
bottom of page