大家好，歡迎收睇「的士新聞資訊」，我係Hayley，美國電動車生產商Tesla喺早前10月10號喺美國加州舉行咗一個名為「We Robot」嘅發佈會，發佈會上首次展示咗無人駕駛的士「Robotaxi」，並且由公司行政總裁馬斯克乘坐出場，呢款名為「Cybercab」嘅雙座位無人駕駛的士，外形充滿未來感，車身光滑而且冇後窗，配備兩道鷗翼車門，車廂裡面冇軚盤同腳踏，採用咗無人監督嘅全自動駕駛系統，預料會喺2026年正式投入生產。
馬斯克表示，「Cybercab」嘅售價預料唔會超過3萬美元，即係大約HK$233,000，由於呢架車係用無線導電充電，所以係毋須接上插頭充電，使用上更加方便，估計行駛每英里嘅成本大約為20美仙，即係大約HK$1.55左右，佢又指出，自動駕駛的士嘅使用頻率可以較一般嘅私家車提升5倍甚至10倍。
其實馬斯克嘅計劃係營運一支自動駕駛的士車隊，Tesla嘅車主可以將佢哋嘅車輛喺閒置嘅時候變成的士賺錢，馬斯克表示，喺「Cybercab」量產之前，現有兩款型號嘅車主可以率先體驗無監督全自動駕駛功能，當中包括「Model 3」同埋「Model Y」型號嘅車。
喺發佈會上，大型無人駕駛客貨車「Robovan」亦都驚喜現身，呢架車最多可以容納20位乘客，佢亦都可以用嚟運載貨物，有助解決高密度交通嘅問題，另外馬斯克亦都展示咗最新一代人形機械人「Optimus」，呢班機械人唔單只可以好靈活咁一齊跳舞，而且仲識得招呼出席發佈會嘅嘉賓，馬斯克表示，呢個項目上最近都取得好大嘅進展，每部機械人嘅目標定價大約2至3萬美元，即係大約HK$15萬至23萬左右一部。
馬斯克同時亦都披露，喺下年2025年，Tesla將會喺德州同加州啟動完全自動駕駛功能FSD，搭載咗呢個技術嘅「Robotaxi」較人類駕駛安全大約多出10倍，可以令架車更加安全，令大家喺坐車嘅時間同用手機嘅時候一樣咁愉快、享受同安全。
唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Hayley
香港的士交易所 HKTEx 主播
2024年10月11日
P.S.：詳細短片版本請於YouTube上收看：https://youtu.be/JGEojT82nAA
